भारत-पाकिस्तान दरम्यानच्या संभाव्य चर्चेशी निगडीत असलेल्या तीन सूत्रांच्या हवाल्याने ब्रिटीश वृत्तपत्र ’फायनान्शियल टाइम्स ’ने याबाबतचे वृत्त दिले आहे.
इस्लामाबाद: भारत आणि पाकिस्तान सरकारमध्ये असणारा कडवटपणा लवकरच संपुष्टात येण्याची शक्यता आहे. भारताचे पंतप्रधान नरेंद्र मोदी आणि पाकिस्तानचे पंतप्रधान इम्रान खान यांच्यात लवकरच चर्चा होणार असल्याची शक्यता वर्तवण्यात येत आहे. पाकिस्तानच्या लष्करप्रमुखांनीदेखील भारत-पाकिस्तानमध्ये पुन्हा चर्चा झाली पाहिजे अशी भूमिका मांडली होती. भारत-पाकिस्तान दरम्यानच्या संभाव्य चर्चेशी निगडीत असलेल्या तीन सूत्रांच्या हवाल्याने ब्रिटीश वृत्तपत्र ’फायनान्शियल टाइम्स ’ने याबाबतचे वृत्त दिले आहे. भारत आणि पाकिस्तानमधील संबंध पुन्हा सुरळीत व्हावे, यासाठी संयुक्त अरब अमिराती मध्यस्थी करत आहे. पाकिस्तानचे लष्करप्रमुख जनरल बाजवा यांनीदेखील भारताचे राष्ट्रीय सुरक्षा सल्लागार अजित डोवाल यांना काश्मीरमधील कारवाई थांबवण्याचे आवाहन केले आहे. कोरोनाच्या संसर्गाने घातलेल्या थैमानामुळे दोन्ही देशांची अर्थव्यवस्था संकटात आली आहे. त्या पार्श्वभूमीवर ही बैठक पार पडत आहे. फायनान्शियल टाइम्स ने दिलेल्या वृत्तानुसार, भारत आणि पाकिस्तानमध्ये होणारी चर्चा ही संयुक्त अरब अमिरातीचे शासक मोहम्मद बिन जायद अल नहयान यांच्या मध्यस्थीने होत आहे. त्यांच्या या प्रयत्नानंतर 25 फेब्रुवारी रोजी दोन्ही देशांमध्ये शस्त्रसंधीवर सहमती झाली. आता या पुढे दोन्ही देशांमध्ये कोरोनावर सहकार्य आणि व्यापार सुरू होण्याची शक्यता आहे. हे टप्पे पार पडल्यानंतर दोन्ही देशांच्या पंतप्रधानांची बैठक होणार असल्याची शक्यता आहे. येत्या वर्षभरात ही बैठक होईल, असा अंदाजही वर्तवण्यात आला आहे. पडद्यामागून सुरू असलेल्या घडामोडींशी निगडीत एका सूत्राने सांगितले, की मोदी आणि इम्रान खान यांच्या भेटीसाठी वरिष्ठ स्तरावर हालचाली सुरू आहेत. मागील आठवड्यात पाकिस्तानच्या कॅबिनेट समितीने भारताकडून साखर आणि कापूस आयात करण्याची घोषणा केली होती; मात्र, विरोधकांच्या दबावामुळे पाकिस्तान सरकारने या निर्णयाला मान्यता दिली नाही. भारताने जम्मू-काश्मीरचा विशेष राज्याचा दर्जा संपुष्टात आणल्यानंतर पाकिस्तानने भारताशी व्यापार संबंध तोडले होते.